مفهوم الغذاء الصحي
لما قررت اغير نظام حياتي واسلوبي بالعيش كان يحتاج مني قرار قوي وصارم بهذا الخصوص، وكان لازم احتاج مساعدة وتوجيه بهذا العالم الغريب الي اني بي، هنا اجة دور صديقي والكابتن العظيم همام ستار الي غيرلي نظرتي للحياة وساعدني هواي بهذه الخطوة
همام گلي كلمتين كل وحدة بتوقيت وضروف مختلفة بس بقن في بالي وتاثرت بيهن، الاولى
(Its never been too late!)
معناها لن يكون الوقت متأخرا ابدا
والكلمة الثانية هي
(If you don't have time for your health, you will need to find time for your sickness)
معناها اذا ماعندك وقت لصحتك فرح تحتاج ان تجد وقت لمرضك
وهنا عرفت انه مهما كنت اني اقنع نفسي باني مشغول وعندي التزامات وارتباطات ففي يوم من الايام ممكن ارتبهن او ااجلهن في سبيل اعالج نفسي من مرض معين او حالة طارئة فقررت انه الافضل ان اجد هذا الوقت هسة وارتب التزاماتي لتكون عملية تحويل اسلوب الحياة عي الاولوية بين باقي الالتزامات كون الها ارتباط وثيق بصحة العائلة وقوتها وفاعليتها
اول شي سويتة كعدت قريت عن الغذاء الصحي والانظمة الغذائية والمكملات الغذائية وكابتن همام ساعدني كلش هواي وانطاني مصادر الي ابدي بيهة وكان دايماً يوجهني وراها حددت اهدافي المرحلية والهدف الاستراتيجي وخليت شكل جسم في بالي اريد اوصله وبلشت بشهر مارس اذار الماضي هذه الرحلة بصورة جدية والتزام تام لدرجة انه كثير من افراد العائلة او الاصدقاء ماكنو مصدقين انه رح اكمل ورح اتغير والتزم بهذا القرار الي اتخذته
اشياء تعلمتهة خلال فترة ستة اشهر الماضية وقرارات صارت خلال الفترة
- ماكو اكل وجبات سريعة
- دايماً احضر واطبخ اكلي بايدي
- دايماً احضر اكل لعدة ايام مسبقاً واجمدة بالفريزر الى وقت الاستخدام
- المكملات الغذائية مهمة ومفيدة بشرط الاستخدام الصحيح وبمتابعة مختصين واصحاب خبرة
- دايت بدون تمرين تعب وحرمان من اكل طيب بالخالي بلاش
- تمرين بدون دايت هو عملية تشويه للجسم والعضلات لان رح يصير جسم معضل بكرش
- اول شهر او شهرين ماكو داعي لاستخدام اي نوع مكملات غذائية
- اذا ضايج او متكأب او متضايق من شي بس اصعد على جهاز الجري ورا نص ساعة مشي سريع انزل انسان ثاني وبذهنية جديدة تماماً
- تنزيل الوزن وخاصة شحوم البطن يحتاج صبر وتحمل وتفهم كبير جداً لانه ابداً مو موضوع سهل ويحتاج تعب وتعب وتعب
- ماكو داعي تشترك بالمركز الرياضي في باقة الرشاقة والتنحيف والي هي عادةً تكون جداً غالية، كل الي تحتاجة هو جهاز الجري اي شي ثاني ما الة داعي
اعتقد هاي اهم الاشياء للمرحلة الحالية واكيد خلال الاستمرار رح اتعلم كلش هواي شغلات ثانية
هسة اجة دور الاشياء الي انحرمت منهة
- الباچة
- الدولمة
- البرياني
- تمن ابو الحكاكة بانواعه
- الثريد والتشريب بانواعه
- الشيخ محشي
وكل ما لف لفهم وكان على شاكلتهم
ما تتخيلون شكد صعب شعور جدر الدولمة كدامك مصبوب وانت تاكل صدر دجاج وبزاليا خضرة وبروكلي
الحمدلله على كلشي بس دايماً كنت اذكر نفسي ليش بلشت والى وين اريد اوصل فاصبر واتحمل واكمل صدر الدجاج والبزاليا مالتي ههههههه
ادناه هذا نموذج للنظام الغذائي الي التزمت بي مع انواع للاكلات الي كنت احضرهة واطبخهة وكانت دعاء تساعدني بكثير امور وتسهل علية ان التزم بقراري واحقق هدفي الي اريده
الريوك
- شوفان+زبدة الفستق+حليب مطعم بالكاكو+موز (انت تحدد الكميات حسب رغبتك)
او
- بيض عيون او بيض مع جبن او بيض مع فطر وبصل وثوم او بيض مسولق او بيض بالمايكروويف المهم بيض واني اكل اربع بيضات
او
- جبن عرب
طبعاً كل ما سبق اعلاه بخبز اسمر ماعدا الشوفان طبعاً بدون اي شي ومع الكثييييير من الخضرة معدنوس وريحان ونعناع
وچاي اخضر ورا كلشي طبعاً
الوجبات خلال اليوم ما عدا العشاء
اني كنت اكل بمعدل وجبتين ما عدا الريوك والعشا
-دجاج مطبوخ عالبخار مع الخضروات
- دجاج مشوي بالكيس مع الخضروات
- دجاج مطبوخ عالبخار مع الفطر والخضروات والحليب وجبنة الشدر كرافت طبعاً
- دجاج مسولق عادي مال امك
- دجاج تندوري
- دجاج كاري
- سمك فيلية مشوي بعد ما اطمسه بمختلف انواع البهارات
- سمك مشوي عادي مال بيت
- بيف ستراكنوف (اني اسوي بالبيت)
- كفتة لحم بقري
- برغر مشوي بالبيت لحم بقري فقط
- لحم بقري مطبوخ عالبخار مع الخضروات
طبعاً بالنسبة لهذا الاكل اهم شي البهارات والي اني استخدمه هو:
- جنجر مطحون
- كبابة (مع اللحم البقري)
- كمون
- زعفران (مع الدجاج)
- روز ماري (اكليل الجبل)
- ورق الغار(مع الدجاج)
- مكعبات ماجي
- هيل
- قرنفل
- كركم
- كاري
- ملح
وانت تحط شنو يعجبك
العشاء
- زلاطة
- فواكه بس مو موز
- لبن وخيار وبي كومة ثوم
- لبن مع بروتين
- شوربة بدون شعرية
- باذنجان مشوي وبعدين تحمسه مع زيت زيتون
وبالتاكيد بدون اي كاربوهيدرات
الكاربوهيدرات مالتي
- تمن مسلوق فقط بدون اي اضافات من زيوت بس احطله زعفران وملح وممكن مكعب ماجي
- بطاطا مسلوقة
- بطاطا مشوية
- بطاطا مهروسة مع الجبن (جبن عرب او موزريلا)
- معكرونة او سباكيتي سمراء فقط
- خبز اسمر او صمون اسمر
والكاربوهيدرات مالتي كنت دايما احرص على ان ما اكل اي شي منهة بعد التمرين
دايماً قبل التمرين لازم تكون اخر وجبة كاربوهيدرات
وانت تحدد الكميات حسب رغبتك
كل اسبوع تقريباً اكو وجبة دسمة تنشط الجهاز الهضمي والعصبي للجسم لكن رجاءً لاحظو اني كلت وجبة مو تسوون مثلي وسووهة يوم كامل كله وجبات تنشيطية!! هههههه
عموماً النتائج تكبر بكبر درجة الالتزام بالرياضة والنظام الغذائي التزام قوي نتائج قوية
ونصيحتي اذا انت او انتي ما ناوين تكملون وتردوهة بس مجرد مرحلة لفترة معينة فلا تطبون وتبلشون اصلاً بان فعلاً بيهة تعب كبير فلو تبلشون وتصنعون من نفسكم اشخاص نشيطين صحيين ومثاليين او خليك على حالتك وارضى بالي عندك من كرش او عندچ من ارداف
مودتي وتحياتي
