ايجابيتي سر حياتي

أشياء سويتهة علمود اطور روحي وأغير عقليتي نحو الايجابية واحسن من قدراتي الذهنية:

- علمت نفسي اسمع سمفونيات عالمية وقريت تاريخ هواي من عدها لحد ما حبيتها وخليت مجموعة كبيرة منهة على موبايلي حتى باي وقت ألجألها، السمفونيات ليست مجرد موسيقى، انها عبق روح ومشاعر وأفكار

- كل سنة اجمعلي كم فلس على صفحة واسويلي سفرة سياحة لفد مكان اهم شي بي شغلتين مكان هاااااادي وبي بحر والشي الثاني يكون اكو بي مكان اثار او حضارات قديمة تاريخية، كل ساعة قضيتهة بهيج مكانات واني صافن بالعمق الروحي والتاريخي الي بيهة احس دماغي دا يتضاعف حجمه (لبنان، تركيا، إيران، ماليزيا، والخيارات واسعة للي يريد وكله بالجواز العراقي)

- الفن الصوفي من غناء وموسيقى وعروض فنية، هي انتقالة للصفاء الذهني الى اللانهائية وما بعدها

- ارتبطت بالتراث العراقي بمختلف اوجهة الثقافية لسبب جداً بسيط، كلش عميق، اعمق مما ممكن نتخيل وكل ما تعمقت بي حسيت شكد اني جذوري ثابته بالارض الي نولدت بيهة وربيت عليهة

- عاملت نفسي كمحترف، كونت وقويت علاقتي بالناس الناجحين والمحترفين بمجالاتهم وكونت علاقات كثيرة وواسعة، الي يبيعني تعلمت ما ابيعة وانما اشتري كل الناس واحب كل الناس، المرء بخليله فانظر من تخالل!

- احترمت المرأة وحبيتهة وخليتلها مكانه كبيرة عندي لان هذا هو الي تستحقه، كيف تنظر للمرأة؟ هكذا ينظر المجتمع لك وان اخفيت ذلك، الافكار لها انعكاسات على السلوك!

- خليت العائلة رقم واحد بالنسبة الي، قبل عملي وقبل اصدقائي وقبل اي شي، كلما كان اهتمامي قوي بالبيت والعائلة كان التزامي اتجاه المجتمع اكبر واقوى، العائلة القوية هي أساس المجتمع القوي

- لعبت رياضة، والتزمت بمركز رياضي ونظام غذائي، ماكو شي ممكن يوصف الحالة الذهنية الي تصير بيهة بعد ما تخلص التمرين وترجع للبيت، كم مخيف من الايجابية والطاقة

كل هذا هو #وجهة_نظر وتجربة شخصية ممكن تنفع ويا غير ناس وممكن لا، الايمان هو المفتاح لكل شي وهذا هم وجهة نظر